يوميات جامعيه`

احم احم ....

جيت بموضوع ... رديتوا ولا ما رديتوا كله وااحد
الموضوع راح يتضمن بعض الاشياء اللي صارت معايه في الجامعه.. مثل ما نقول .. "يوميات"
وخااصه أنه دوام .. والواحد يدوّر شي يتلهاابه (يلهو به) في هالفتره .. : )

صح أن الفكره كانت وارده .. بس ما كنت متوقعه أنزلها بهالسرعه : )
انا حرّه باللي أكتبه .. يعني مب كل شي راح أكتب .. بس الاشياء اللي حابه أنشرها : )

عشان كذا .. قلت " رديتوا ولا ما رديتوا كله وااحد " ..،
لأنه مجال القراءه راح يكون الأفضل هناا : )
ولكم حرّية الرّد ..
يمكن اللي راح اكتبه ما يسوى .. بس يالله خلنا نتعود نكتب "يوميات" .. : )

:

اليوم ( الأثنين )
11 / فبراير / 2008م

على الأرق اللي ياني ليلة الاثنين إلا أنه ( نور - الخدامه ) قدرت توعيني الساعه 6 وثلث صباحًا
مع العلم أني تقلبت من الساعه 11 لين الساعه 2 الفير (الفجر) .. ولا ياني رقااااااد !!

من الساعه 6 وثلث .. ضبطت نفسي للدواام ..
وطلعت من الغرفه الساعه 7 وربع وشاله من الثلاجه عصير لاكنوور فواكه .. انا احبه
اول من صبحت في ويهه .. ( ليتاا - مربيه ) .. تقولي .. "نور" محد .. راحت مع العيال المدرسه
وكانت مستعده أنها توصلني الجامعه .. لأنها على علم بأني ما أداني أتعامل مع
( جونيا - الطباخه / الكل يعرف أني ما احب اتعااامل معاها لأنه اسلوبها مش مرتب .. اتفشل منها !! )
رديت عليها .. وقلت مش مشكله بنتحمل اليوم ...

رحت لغرفة الطعام .. ما ادري ليش .. يمكن لأنه شي تعودت عليه ريولي (رجولي)
لقيت امايه .. تشوف شاعر المليوون .. كالعاده من تصبح لين ما تمسي واهي شاعر المليون ...

طلعت من الغرفه .. وناديت علي جونيا .. وركبت السياره على الساعه 7 و 25 دقيقه
30 دقيقه بين بيتنا والجامعه .. هذا اذا سرعه السياره 100

خلال هالفتره .. اسمع إمارات إف إم ..

ومن ما سمعته هذا الصباح وعلى أثير إمارات إف إم ... وعيبني ...

}

معك كوب من الشاي المر ،
وضعت به بعض السكر .. ولم تحركه !

هل ستطعم حلاوة هذا الشاي ؟
الإجابه هي .. ( لا )

انتظر بعض الوقت
هل سيتغير الطعم ؟!

الإجابة ( لا )
سَيَبْرُد الشاي .. وأنت لم تطعم حلاوته !!
لتطعم حلاوت الشاي .. يحتاج إلى التحريك ..

عزيزي المستمع :

الحياة كـ "كوب الشاي"
إذا لم تتحرك .. لن تطعم حلاوتها !
تحتاج إلي إبداعك وعملك حتى تستطيع تحريكها ..
( لتطعم حلاوتها )

{

من بعد ما سمعته .. حسيت أني متشجعه لليوم الجامعي الحااافل !!

من بعد مرور الـ 30 دقيقه .. وصلت للحرم الجامعي .. على الساعه 7 و 55 دقيقه
وصلت الكلاس ع الساعه 8 و 3 دقايق تقريبن
دخلت البوابه ومن البوابه لمبنى 71 (يسمونه المخج)
ومن المخج لمبني 80 ( يسمونه المول أو مبني الانشطه والاكثر يسمونه المبني)
ومن الطابق الارضي للطابق الثاني

كان عليه مساق ( المايكرو ) من الساعه 8 يلين 9 وربع

الاستاذ "الشعراوي" من اسمه مصري
شو تتخيلون .. مصري .. كبير شوي في السن
ولهجة المصارى والانجلش ( سمسينق ) .. الله لا يبلانا

يكفي انه الصبح .. والناس مب راقده زين ..
ونبرة صوته اللي ترقد (بسجل صوته يوم من الأيام )

أكثر ما شدني من محاضرته اليوم اهو وكيف يناقش كيفية مناداتنا له ..
بكتبه مثل ما قال تقريبن .. يمكن يكون ناقص بس مب زاايد

(( I have a student who I can't change her behave
even that she takes two courses with me and she still call me teacher (استاز).
You must behave like collage students, and grow up from high school life.
Don't call me a teacher because that a little bit not formal and it is for high
school student. Don't call me sir because thats build a glass wall between us.
Call me "Dr. Sha'arawi" is good and thats make you behave like collage students !!))

مدري الحين الالقاب اهي اللي تعيشنا حياه الجاامعه !!
الاستاذ ما عرف كيف يخلي البنات يقولن له دكتور !!
الحين اذا سميته دكتور شعراوي صرت بنت جامعيه .. اذا قلت له استاااااااززززز صرت بنت ثانويه !!!!!
كلا المرحلتين الشخص يكون فيها طالب اللعلم .. والاستاااااازززز بالمدرسه ولا بالجامعه يقوم بنفس العمليه
حسيت انه غبي .. عااااد اللي يقول بناااديك دكتووور ... بتبطي الساع

ايه قبل لا انسى .. كانت بنت قاعده جنبي وحاطه موبايلها على طاولة الكرسي .. اقرب لي منها "يعني اقدر اشوف"
وكل ساعه تشوف بالموبايل .. وعلى بالي تشيك بالوقت وكم باقي !
وبعدين اشوفها تفتح الرسايل النصيه وتطلع .. ما كانت لي طبيعيه ابدن
المهم وقبل لا يخلص وقت الكلاس بعشر دقايق .. اشوفها تدخل الاسامي الا وحاطه على ( روحي )
جتني ضحكه الحمدلله اني مسكتها .. والحمدلله أنه محد من صديقاتي معايه .. ولا ما راح اقدر امسكها
بس شكلها ما يوحي ابدن ابدن :|
أدري أنه احتمال يكون روحي ( زوجها / ابوها / امها / صديقتها / حبيبهاااااا ... الخ )
بس دايم النوايا السيئه هي اللي تي (تجي) على بالي أول !!
الله يهديهن ...

وباقي الكلاس .. قعد يتكلم عن الدرس .. وطلعنا ع الساعه 9 و 18 دقيقه
لازم يطلعنا قبل 3 دقايق ..

طلعت من الكلاس .. وانا امشي قاعده اقول ان شاء الله أحصل اصنصير وما يتأخر
وجااا في بالي بنت عمي واهي تقول انها تمشي من البوابه لين مبناهم عشان تتنشط
ولأنها طول اليووم بتكون قااعده .. فقلت خلني أنزل بالدري (الدرج) من الطابق الثاني للأرضي
ولحسن الحظ أنه الكلاس الثاني في نفس المبنى

قضايا عالميه / من الساعه 9 ونص لين الساعه 10 و45 دقيقه

رحت لين الكلاس .. وانتظرت لين طلع الاستاذ اللي فيه عشان ندخل
ولما قعدن البنات .. ودخلت .. إلا بنت تقرا اعتذار الاستاذ عن المحاضره بورقه من الباب الثاني للكلاس !!

هذي ثاني مره احضر له .. ولا يحضر !
لين اللحين ما شفت خلقته هالاستااااذ ؟!!
ارسلت لي سيس وقتها مسج تقول انها بتتأخر ..
واذا وصلت ع الساعه 10 بتحضر الكلاس
طرشت لها مسج ابشرها أنه معتذر !!

بما أن بيننا تحدي أنا وسيس .. عشان كذاا ما اتصلت لي ولا اتصلت بها
وأبشركم كسبت التحدي

المهم .. رحت للمطاعم حصلت بنت اعرفها (أ) قاعده لوحدها
وقعدت معاها ... ويت (جات) ربيعتها (غ) .. ويت من بعدها (سيس)
بعدين تريقنا .. في هاللحظاات .. كانت بنت حااطه عرض بالـ data show .. ومطوله على الاناشيد

واحتجت (أ) على اسلوب القوه اللي تخلي البنات يسمعن للأناشيد
يعني تبين ولا ما تبين .. اسمعي الانشووده مثل ما استخدمن هالمجموعه من الطالبات القوه بمنع الاغاني
الا اذا تبين تسمعين هاتي سماعاتج معاج !!

ومعلومه اخذتها منها مدري اذا صحيحه
أنه الاناشيد حرام ! قعدت اناقشها فيها .. قلت كيف حراام ... الخ !!
اهو قصدها .. مثل ما الاغاني تذهب الناس عن قراءه القرآن ..
ترا في ناس الاناشيد تأخذهم عن قراءه القرآن .. ما اقتنعت فيها ابدن !
مع أنها كانت متأكده اهي منها !!!!!!!

الله يهدينا ويهدي الجميع

خذتنا السوالف ويت بنت وعقبها بنت << يعني "مرء الوئت"
راحت سيس للسوق وانا رحت للكلاس الثالث

هذا الكلاس في مبنى 66 ... وما ادري ليش ما احب هالمبنى .. احس اللي فيه بنات كباار في السن !!
يمكن لأنه هادئ مقارنه بالمبنى !!

مساق اصول علم السياسه / من الساعه 12 و30 يلين الساعه 1 و45
الاستاذ .. هويدن

إماراتي .. توزيعه للدرجات حلوو .. ماشي بحوث .. كل شي تحريري
مساق يدرس بالانجليزيه .. بالنسبه كأول محاضره يعطينا اياها
كانت واضحه .... ولله الحمد ...

من بعد ما خلصت المحاضره .. رحت ادوّر الكلاس الرابع
حدّث ولا حرج

مساق مشكلات اجتماعيه / من الساعه 2 يلين 3 وربع
الاستاذ إدريس سالم الحسن .. زائر هالفصل من الخرطوم جاي
من الزوووول لاند : )

فيه صفات السوداني الاصيل ...وغير أنه كبير بالسن
ويلبس نظااره طبيه تخلي عيونه صغار .. نفس حبة البن .. وطويل القامه

هذا الدكتور تأخر علينا شوي ..
دخل .. سلّم .. ردينا عليه السلام ..

يقطر علينا بالكلمات ... ساعه تسحبون منه كلمه ...
والمحاااضره نوم في نوم ... !!

الشي اللي استهبلته فيه اهو ...

قاعد يشرح السوداني ....

Teacher: ........ pollution . Do you know the meaning of pollution?
Students: yes, we know it and it's mean " تلوث"

الاستاذ وقف الشرح .. وراح يكتب الكلمه ع الصبوره ... وقال:

the pollution is "تلوث"

في خاطري قاعده اقول ... قل قسم بالله !!!!!
وش ذا الهبل !!
اللي بالابتدائيه يعرفون التلوث وانت تشرحها لنا !!
مصخرررره !!!!!

بالمختصر ... يرقد .. يرقد .. يرقد
وشكله طيب .. هههه

وطلعنا الساعه 3 و 8 دقايق .. ورحت للمخج ..
تلاقيت معا صديقاتي (سايلنت هارت وآن تولد ستوري /معنا بالمنتدى) عشان آخذ رقمي الجامعي
(طلبت منهن يسحبن لي كتاب .. بس زحمه كان وسالفه )

قعدت عندهن تقريبا عشر دقايق .. واتصلت سيس .. ورحت لها بالمبني
تغديت معها ومع صديقاتي الثانيات { (س/مسجله بالمنتدى بعد) و (ف) }

ومممم .. وبعدين راحت سيس لكلاسها ع الساعه 4 ... وكملت القعده مع البقيه
يلين الساعه 4 و 45 .. انتظر غنج تخلص .. وأرجع معاها
علي اساس اني أرجع الساعه 3 وربع .. بس قعدت لعيون سيس

ورجعت البيت ... واللي في البيت مالكم خص فيه

هذا ليوم الاثنين ...

اذا ما صار تكاسل مني .. باكتب شو بصير معي بالايام اليايه
انشالله بس ما مليتوا معااي
ترا في تفاصيل واايد ما ذكرتهن .. ترا هذا مختصر المختصر
وصراحه تعبت ..

ســــلام